U Rwanda rurushiriza gukoresha ubuhinga bwo mu kirere mu guteza imbere igihugu.

U Rwanda ruriko rurushiriza gukoresha ubuhinga bwo mu kirere kugira ruteze imbere uburyo bwo gufata ingingo no gushigikira imigambi y’iterambere ry’igihugu. Igihugu c’U Rwanda cagiranye ubufatanye na Planet, ishirahamwe ryo muri Amerika rikora ivyerekeye gukurikirana isi hakoreshejwe amashusho afatwa n’ibisatiriyete.

Muri ubwo bufatanye, amashirahamwe ya Leta, kaminuza za Leta, zimwe mu ntangamarara z’ubudandaji zikoresha ubuhinga bwa none, hamwe n’abafatanyabikorwa mu vy’iterambere, bazoshobora kuronka amashusho n’amakuru ava ku bisatiriyete hafi buri musi.

Uwo mugambi uyobowe na Rwanda Space Agency (RSA), ufise intumbero yo gutuma amashusho y’isi afatwa n’ibisatiriyete aba kimwe mu bikoresho bihambaye bifasha mu gufata ingingo no gutegura imigambi mu bisata bitandukanye vy’iterambere ry’igihugu.

Biciye muri ubwo bufatanye, inzego za Leta zizoshobora kuronka amashusho y’isi afise ubuziranenge bwo hejuru. Aya mashusho azofasha mu gutegura no kunoza imigambi ya Leta hamwe n’ugutegura iterambere ry’igihugu.

Aya makuru arashobora gukoreshwa mu gukurikirana iterambere ry’uburimyi n’umutekano w’ibifungurwa, kugenzura uko amashyamba ameze n’uburyo ashobora kwihanganira ibibazo bitandukanye, guteza imbere imigambi y’iterambere ry’imijyi, gutunganya ibibanza vyubakwamo, hamwe no gukoresha neza amatongo.

Uwo mugambi urashobora kandi gufasha U Rwanda mu gukinga no gucungera ibiza. Amakuru ava ku bisatiriyete arashobora gukoreshwa mu kwitegurira ibihe vy’amage, gusuzuma ingaruka n’akaga vyatewe n’ibiza, no gufasha mu bikorwa vyo gusubiza ibintu mu buryo no gusana ahangijwe.

Ku ruhande rwa Rwanda Space Agency, intumbero ni uko buhorobuhoro amashusho y’isi afatwa n’ibisatiriyete yokwama ari kimwe mu bikoresho inzego za Leta zikoresha mu gufata ingingo ku nzego zitandukanye z’ubuyobozi.

Kuronkera ku gihe amakuru mashasha yerekeye uko igihugu n’ubutaka bigenda bihinduka bizofasha abategetsi kubona imbere y’igihe impinduka zimwezimwe zishobora kubaho, maze bafate ingingo zijanye n’ibiboneka ku butaka.

Uwo mugambi urimwo kandi igice kijanye n’inyigisho, ubushakashatsi no guteza imbere ubumenyi n’ubuhinga. Kaminuza za Leta zo mu Rwanda zizoshobora gukoresha amashusho n’amakuru ya Planet mu nyigisho, gutegura ivyigwa bishasha no gukora ubushakashatsi mu bisata bijanye n’ubuhinga bwo gukoresha amakuru yerekeye ubutaka n’ibisatiriyete.

Uwo mugambi kandi ugamije guteza imbere ubushobozi bw’abanyarwanda mu vy’ubuhinga. Abahinga, abashakashatsi hamwe n’abanyeshure bazoronka ubumenyi bukenewe kugira bashobore gusoma, gusesangura no gukoresha neza amakuru ava ku bisatiriyete.

Ivyo vyigwa bizofasha U Rwanda kuronka abahinga b’imbere mu gihugu bazi gukoresha ubuhinga bwo mu kirere mu guteza imbere igihugu.

Zimwe mu ntangamarara z’ubudandaji zikora mu bisata bibonwa ko ari ngirakamaro ku iterambere ry’igihugu nazo zizoshobora kuronka amakuru ya Planet hafi buri musi. Zizoyakoresha mu gutegura ibisubizo bishasha no guteza imbere ibikorwa bishingiye ku makuru yerekeye ubutaka n’akarere.

Biciye mu gufungurira umuryango abikorera utwabo, uwo mugambi ugamije guteza imbere udushasha mu vy’ubuhinga, no gufasha iterambere ry’ubutunzi rishikira abantu benshi.

Ubu bufatanye bukurikira umugambi w’igeragezwa washizwe mu ngiro i Zanzibar, ufashijwe na Tony Blair Institute hamwe na World Bank. Nk’uko Planet ibivuga, ubu ni bwo bufatanye bwa mbere bufise igisata c’igihugu cose ishirahamwe Planet rigiranye n’igihugu co muri Afurika mu gutanga amakuru ava ku bisatiriyete.

Planet Labs PBC yashinzwe mu mwaka wa 2010 n’abahinga batatu bahoze bakorera NASA. Iryo shirahamwe rizobereye mu gukurikirana isi hakoreshejwe ubuhinga bwo mu kirere. Rikora, rikubaka kandi rigakoresha ibisatiriyete vyinshi bifata amashusho y’isi.

Planet itanga amashusho y’ibisatiriyete, amakuru yerekeye ubutaka n’akarere, hamwe n’ibikorwa vyo gusesangura ayo makuru, ku bihugu, amashirahamwe y’ubudandaji hamwe n’ibigo vy’ubushakashatsi.

Planet ivuga ko urunani rw’ibisatiriyete vyayo rugizwe n’ibisatiriyete bigera hafi kuri 200, bishobora gufata buri musi amashusho y’ibice vyose vy’ubutaka bw’isi.

Ubu bushobozi butuma bishoboka gukurikirana impinduka ziba ku buso bw’isi kenshi kuruta uko vyari bisanzwe bikorwa n’ubundi buryo bwo gufata amashusho hakoreshejwe ibisatiriyete.

Ku Rwanda, ikibazo nyamukuru gisigaye ni uguhindura ayo makuru menshi ava mu kirere akavamo ibikorwa bifatika mu gucunga ubutaka, guteza imbere uburimyi, kubungabunga ibidukikije, guteza imbere inyigisho n’ubushakashatsi, gukinga ibiza no guteza imbere ubuhinga bushasha.

Ubu bufatanye rero bwerekana iyindi ntambwe nshasha U Rwanda ruteye mu gushira ubuhinga bwo mu kirere mu migambi y’iterambere ry’igihugu.